Κάλαντα και χαπάρια…
Του Μωυσιάδη Παναγιώτη
Έρθαν τα καλαντόφωτα
και η νεοχρονία,
‘ς ση γην καρδοχαρέματα
χίλ’ μύρια ευχία….!
Οπίσ’ εμουν εφέκαμε
τρόικας και μνημόνια
κ’ έμπρε μουν ετσαϊρωσαν
αχάντια και τριβόλια..!
Κανείς ‘κι θέλ’ να κλώσκεται
αβούτο η χρονία,
γιατί εξέρ’ ατό καλά ,
θ’ έρται η χειμωνία…!
Ίλλιαμ’, ατά τα εκλογάς
να μη γίνταν καμίαν,
παρ’ έξ’ ας σα ταξίματα
θ’ έρται κακοπερία..!
Ο κόσμον θα πληρών ατά ,
τα χρέατά τουν όλια,
και ‘ς ση ζωής θα πορπατεί ,
τα τίκια τ’ ανηφόρια…!
Ποδαρικόν θ’ εφτάει ‘μας εν
η Μέρκελ, η φραντάλα,
ατέ τ’ Ελλάδας μητριά
και του λαού η χάλα…!
Ατέ, όντες θα έρχεται
θα πέρ’ ‘μας τ’ ανοιγάρια,
κι ο κόσμον θα πορεύκεται
τσατίνια και λυγάρια…!
Γιατί εξέρ’ ατο καλά,
ατό την τραγωδίαν,
απ’ έξ χαράς ταξίματα
κι απέσ’ ανεχετείαν..
Ας σο πολλά το τάξιμον
κανείς κ’ ελειφτασέφτεν,
άντσαχ ο μαύρον, ο λαόν,
μίαν ‘κ’ εζεγκινεύτεν…!
Εμάτ’σαν ατον να πορεύ’
με χρέος και με δόσια,
και τα ευρώ, τα φούλιρα,
εποίκαν ατά γρόσια…!
Το χρέος επεπλέθυνεν
έναν τσαρέν κ’ ευρέθεν,
και ο λαόν ας ση θανάτ’
ακόμαν ‘κ’ αναστέθεν…!
Ίλλιαμ = προπάντων – κατ’ εξοχήν. κακοπερία= κακοπέραση τίκια = κάθετα- όρθια. φραντάλα= αφράτη. Χάλα= Θεία . τσατίνια= δύσκολα. λυγάρια= παραπατώντας. ανεχετείαν = ανέχεια. ελειφτασέφτεν= δεν ζημιώθηκε. Εζεγκινεύτεν = πλούτισε. Δόσια = οι δόσεις. φούλιρα =τα φλουριά. τσαρέν= λύση.
